Text da bivgnaint da Renate Zürcher
Cun grond plaschair n’haja cumanzà principi da gün 2026 mia plazza sco ravarenda da la Corporaziun evangelica Scuol-Tarasp. Davo plüssas staziuns s’ha fermada mia vita uossa in Engiadina.
Creschüda sü suna illa Svizra tudais-cha giò’l Bernais (Hünibach-Thun), sco eir in Italia (Firenze). A mai ha adüna interessà dad accumpagnar ad umans. In mia prüma vocaziun n’haja fat da muossadra – e cun 30 ons n’haja ris-chà da far il stüdi da teologia. Daspö il 2011 n’haja lavurà sco ravarenda giò’l Bernais (Emmental, cità da Berna ed a Steffisburg sper Thun).
Uossa m’allegra dad ir a star illas muntognas grischunas, illa bella Engiadina Bassa – e da das-chair imprender vallader! Meis interess per umans, baselgia e teologia es collià cun tscherchar l’aspet divin, in nus ed intuorn nus. Eu accumpogn jent ad umans da mincha età illas differentas situaziuns da vita. Eu less tadlar ad els e (scha mâ pussibel) tils dar l’abiltà da sviluppar lur agens talents, duns e lur aignas pussibiltats – ed a mai para chi nu detta alch plü bel co da scuvrir il «minz divin» in mincha conuman, quella essenza chi’d es in nus tuottas e tuots.
Eu m’allegr dad imprender a cugnuoscher a Vus e’S salüd cordialmaing.
Stat cul Segner
Renate Zürcher